دورة مكياج للمبتدئين - أساسيات المكياج

الكورس كامل متكامل و بتوصل المعلومة مزبوط و بتشرح -كالعادة- الخطوات وايش فايدتها و كيف تسويها بالزبط
و خلال الشرح بتجاوب ع الاسئلة اللي دايما تنسأل و بتركز ع اخطاء المبتدئين وتشرح كيف نتفاداها
بالنسبالي أنا شخصيا اللي ميز هذا الكورس هو تثبيت تحت العين ، لا تفهمو غلط هي في كل الكورسات تشرح تكنيك مختلف لكن انا هذا ناسبني و جاوبلي على أسئلتي
الدورة هذي و كل الدورات بتبدأ فيها من تهيئة البشرة الين بخاخ التثبيت والروج، لكن في كل دورة تشرح طريقة مختلفة وجديدة و دا اثبات ان مافي طريقة وحدة صح لكن خدي اللي يناسبك و يخدم اللوك
حبيت ان فجأة الكونسيلر خطط تحت العين ف شرحت ايش ممكن السبب و بكل بساطة شرحت الحل
و حسستنا ان هذا شي وارد وطبييعي
السلبية الوحيدة عندي هي الصوت و الاضاءة ، في البداية حسيت الصوت شوية مو واضح "كنت بتفرج من اللابتوب "و بعدين زبط ، بخصوص الاضاءة كان في لقطات بسييييييطة جدا تنعد ع الاصابع .. كان توزيع الاضاءة فيها غير مناسب لكن بشكل عام ما أثر على جودة الكورس و المعلومات المقدمة بالعكس
أخيرًا حابة أضيف اني حضرت كل الدورات التانية و كنت مترددة في هذا و بقول لنفسي خلاص شرحت كل شي عندها ، ايش باقي بتقدم .. و ايش ممكن يكون في جديد ؟!
لكن الحمدلله اخذته ، لانه مررة حلو
أحس كأنها شافت ايش كان في فالكورسات الاولانية و حطته هنا
من أسئلة و ملاحظات ً و تعديلات

ماشاء الله يا مشاعل مره انبهرت من الكورس والمعلومات الي فيها مليااانة اشياء مفيدة و الملف الي في النهاية واضح متعوب عليه و صار مرجع بالنسبة ليا ، هذا غير المنتجات المستخدمة في الكورس من افضل الخيارات وانا مره اثق في ذوقك ورأيك ، وحبيت كيف طريقة مكياجك ناعم و في نفس الوقت يبرز الملامح و يحلّي ، طبعا انا احس نفسي من المبتدئات في الميكب فاتعلمت اشياء كثيرة جديدة عليا وحتى طريقة استخدامها للمنتجات مو نفس باقي الارتست ، احس كانها رسامة ترسم في لوحة تبارك الله مره فنانة ، طبعا انا اتفرجت عالفيديوهات اول شي بعدين حاولت اطبّق بنفس طريقتها و مكياجي اتحسن شوية و متأكدة الموضوع يبغاله ممارسة اكثر و ارجع اعيد الكورس تاني وثالث ومتحمسة لمكياجي يتحسن و يتغير للافضل كل مره 🩷🩷 بالنسبة للسلبيات الشي الوحيد الي حسيته هو كويس بس انه ممكن يتحسن هو الصوت في الفيديوهات كانت كل شويه يتغير مره تسجيل بالمايك ومره من الفيديو نفسه ، بس طبعا الصوت كان واضح وما يقلل من فهمنا للكلام و الشرح ابداً ، ف شكراً يا مشاعل على الشغل الرهيب هذا

شهادتي في مشاعل مجروحه أنها هيّا تعملي ميك أب بس أخذت الكورس و أنا كنت مو مقتنعه بفكره اونلاين زي لما أكون قدامها لكن ما ندمت و لا نقطه كورس رائع تعطي تكنيك بسيطه ما نفكر فيها حتى لو اعرف اعمل لنفسي تغير جمال و نظافه اللوك مو عادي بس شفت و طبقت و رحت مناسبه و الله الكل لاحظ و مدح اللوك و حتطلع الفنانه اللي داخل كل بنت الله يسعدك و يسخرلك الناس الطيبه و أكيد حكمل و أخذ باقي الكورسات لأنك غيرتي وجهة نظري تماما عن الاونلاين ❤️❤️

انا مبتدئة وطول عمري اشتري منتجات ممتازة من براندز ممتازة ولا اعرف استخدمها بطريقة حلوة.. الكورس جدًا اعجبني وانصح به.. الشرح كان واضح وسلس خلصته بدون ما احس بالوقت .. وبعد ما طبقت على نفسي حسيت بفرق وااااضح على نفسي ورجعلي شغف الميكاب من جديد بعد انقطاع طويل سرت احط وانا عارفة ايش قاعدة اسوي مو بس هبد

الحلو فيه ان الفيديوهات مقسمة على حسب الخطوة ( مثلاً التأسيس والتصحيح و الكونسيلر و التثبيت وغيرها) وبالتالي وقت التطبيق لو تبي ترجعي لنقطة معينة تقدري ترجعيلها بسهولة ما ياخذ وقت 👌

والحلو كمان ان يجي معاه ملف فيه الخطوات وكل المنتجات المستخدمة بالصور وتضغطي على الصورة يوديك لرابط الشراء مباشرة فيختصر الوقت 👌